الدرس انتهى
الدرس انتهى لموا الكراريس
بالدم اللى على ورقهم سـال
فى قصـر الأمم المتــحدة
مسـابقة لرسـوم الأطـفال
ايه رأيك فى البقع الحمـرا
يا ضمير العالم يا عزيزى
دى لطفـلة مصرية وسمرا
كانت من أشـطر تلاميذى
دمها راسم زهرة
راسم رايـة ثورة
راسم وجه مؤامرة
راسم خلق جباره
راسم نـار
راسم عار
ع الصهيونية والاستعمار
والدنيا اللى عليهم صابرة
وساكته على فعل الأباليس
الدرس انتـهى
لموا الكراريس ..
ايه رأى رجـال الفكر الحر
فى الفكرادى المنقوشة بالدم
من طفل فقير مولود فى المر
لكن كان حلو ضحوك الفـم
دم الطـفل الفـلاح
راسم شمس الصباح
راسم شـجرة تفاح
فى جناين الاصلاح
راسم تمساح
بألف جناح
فى دنيا مليانة بالأشبـاح
لكنـها قلـبها مرتــاح
وساكتة على فعل الأباليس
الدرس انتـهى
لموا الكراريس …
ايه رأيك يا شعب يا عربى
ايه رأيك يا شعب الأحـرار
دم الأطـفال جايلك يحـبى
يقول انتـقموا من الأشـرار
ويسيل ع الأوراق
يتهجى الأسـماء
ويطـالب الآبـاء
بالثـأر للأبـناء
ويرسم سيف
يهد الزيـف
ويلمع لمعة شمـس الصيف
فى دنيا فيها النور بقى طيف
وساكتة على فعل الأباليـس
الدرس انتهى لموا الكراريس
الكلام ده كان من عم صلاح بعد حادثة بحر البقر
ضريح رخام فيه السعيد اندفن
و حفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن
عجبي !!!
• اسمه الحقيقي محمد صلاح الدين بهجت أحمد حلمي
• ولد في 25 ديسمبر 1930 فى شارع جميل باشا بحي شبرا.
• والده المستشار بهجت حلمي الذي تدرج في السلك القضائي بدءًا من وكيل نيابة حتى عُين رئيساً لمحكمة استئناف المنصورة.
• التحق بكلية الحقوق بناء على رغبة والده، ودرس في ذات الوقت في كلية الفنون الجميلة دون علم والده لفترة قصيرة، ثم ترك الدراسة بأكملها وانغمس في العمل الصحفي.
• التحق بروزاليوسف وعمل سكرتير تحرير وظل يرسم بشكل سري إلى أن اكتشفه "أحمد بهاء الدين" -الرجل الثاني بالمجلة وقتها- فأفرد له صفحة كاملة أسبوعيا.
• كتب عددا كبيرا من الأغاني الوطنية وارتبط اسمه بثورة يوليو ومغنيها "عبد الحليم حافظ" وذاعت شهرته من خلال بعض الأغاني مثل "صورة" "السد العالي" وغيرهما.
• كتب السيناريو والحوار لعدة أفلام مثل "خلّي بالك من زوزو"، "أميرة حبي أنا"، "شفيقة ومتولي" و"المتوحشة" كما شارك في إنتاج أفلام "أميرة حبي أنا"، "عودة الابن الضال"، وشارك بالتمثيل في عدة أفلام منها "شهيد الحب الإلهي" عام 62 و"لا وقت للحب" عام 63 و"المماليك" في عام 1965.
• توفي في 21 أبريل عام 1986.
منقول
بلياتشو قال إيه بس فايدة فنوني؟
وتلات وقق مساحيق بيلونوني
والطبل والزمامير وكتر الجعير
إذا كان جنون زبوني زاد عن جنوني
عجبي
أنا كل يوم أسمع .. فلان عذبوه
أسرح ف بغداد والجزاير واتوه
ما أعجبش م اللي يطيق بجسمه العذاب
وأعجب من اللي يطيق يعذب أخوه
عجبي!!
http://salah-jaheen.blogspot.com/
يا بخت من يقدر يقول
واللي ف ضميره يطلَّعه
يا بخت من يقدر يفضفض بالكلام
وكل واحد يسمعه
يقف في وسط الناس ويصرخ : آه يا ناس
ولا ملام
ييجى الطبيب يحكي له ع اللي بيوجعه
يكشف مكان الجرح ويحط الدوا
ولو انكوى
يقدر ينوح
وانا اللي مليان بالجروح
ما اقدرش اقول
ما اقدرش ابوح
والسهم يسكن صدري ما اقدرش انزعه
شوفي قد إيه؟
احنا النهارده إيه في أيام السنه
شتا والا صيف
وفين أنا
إيه اللي وصّلنى هنا
أنا صاحب البيت والا ضيف
صوتي انحبس
ما اقدرش اقول
ما عرفش حاجه عشان اقول
ما اعرفش غيرك انتي بس
يا بت ياللي في حبك العقل اتهوس
مكان غريب
كأنه سجن كأنه مخدع لحبيب
كأنه بير
شباك حديد وعليه ستاير من حرير
والريح بينفد منه زي المسامير
الريح عوى
قلبى انقبض
قلبى اتلوى
الشمس تلج اصفر شعاعها صاروخ هوا
الضلمه تلج اسود كتير
ألوف ألوف القناطير
خبيني في شعورك يا بت
أحسن عروقى اتخشِّبت
شعرك خشن زى الحِرام الصوف يا بت
خبيني فيه م الزمهرير ..
ونَيِّميني في السرير
دخل النبى بردان خديجه لَفِّته
حَطِّت عليه غطيان لحد ما دَفِّته
دخل النبى بردان وقال: فين الغطا
البسمة غطت شفِّته
يعنى ايه ربنا
ربنا
مين اللى نور الكرة الأرضية
مين اللى دورها كده بحنية
مين اللى فى الفضا الكبير علقها
متقعش منها اى نقطة مية
مين اللى عمل البنى ادمين
مفكرين و مبدعين
مين اللى ادانا عقول و قلوب
و شفايف تسال هو مين
مين اللى دايما صاحى واخد باله
و كلنا بنحبه جل جلاله
ربنا
احنا بنحب ربنا
و ربنا بيحبنا
و يحبنا اكتر كمان
لما نحب بعضنا
عمل الفراشة بأجنحة و ذوقها
و كل فكرة مدهشة حققها
البحر حطله ملح لجل يعوم
و مسابش حاجة الا لما خلقها
مين اللى لما بنطلبه يسمعنا
و فى وقت الحزن يشجعنا
و لما نفرح نشكر مين
على انه بسطنا و متعنا
مين اللى قلبه علينا واحد واحد
ربنا
سألتنى طفلة قلت هو ما بيننا
موجود فى كل مكان وبيبص لنا
بيشوف بنسعد بعض ولا لأ
و مالخطر يحرسنا و يحوش عنا
فى كل مكان ربنا موجود
جنب الضعف و جنب المجهود
يا ربنا انت جميل
ومفيش كمثلك فى الوجود
مين الصديق اللى مفيش غنى عنه
و كلنا بنحبه و نخاف منه
ربنا
في الجنة أبريق دهب
ومخدة من ريش النعام
تقعد سيادتك تنجعص
أخر غرام
ترفع عينيك تلاقي منجة مدلدلة
وفاكهة ياما متلتلة
أصناف من اللي الكيلو مش عارف بكام
منجا
فرولة
موز تفاح
يا للعجب
البرتقان ويا العنب
في فرع واحد
يا سلام
جلا جلا
كل الأمور متسهلة
تطلب حواجب نمل ولا قلوب دبب
تحضر بسرعة مذهلة
لكن ما فيش غير بس شيء واحد وحيد
لو تطلبه لا يستجاب
أنك تعوز تخرج
من السور الحديد
إقلع غماك يا تور وارفض تلف
إكسر تروس الساقية و اشتم وتف
قال : بس خطوة كمان .. وخطوة كمان
يا اوصل نهاية السكة يا البير تجف
عجبي !!!
الرباعية الي محطوطة في هيئة صورة دي من موقع قدي كانت عاملة الدكتور شريف,الموقع دة شفتة في اواخر 96 علي ما اتذكر و كان من اوائل المواقع الي شفتها عالنت قاطبة,و بسببة قريت لكتير من الشعرا لاول مرة,دارت الايام و عرفت الدكتور شريف و نسيت اسم الموقع,و حبيت اشكرة هنا
معلش طلعت من الموضوع الاصلي
![blink.gif](http://4.<a href="http://www.forumer.com">forumer</a>.com/html/emoticons/blink.gif)
![mounirian/rose.gif](http://4.<a href="http://www.forumer.com">forumer</a>.com/html/emoticons/mounirian/rose.gif)