قلتلها

سما بيضا
من غير لا شمس
ولا قمر
ولا نجوم
وشارع طويل
بينضف اللى ف بطنه
من ناس كلامهم
يشبه مزيكة بايرة
وبارات
مالهاش أول من آخر
فجأة ضلمت
وانحنت
ويا عواميد النور
لقط معدى
---------------
قلتلها
ابتسامة الصبح
تفرق كتير
قالتلى
الموجوعين
غيطان الأرض
ونداها
سكتت وابتدت مزيكة
شفتى إيه ف قلبى؟
قالتلى
ملح!!
قلتلها
أحسن من طعمى
ف روحى عربجى
عايز يطلع بحماره قرص الشمس
قالتلى
العشق دية القتيل
قلتلها
كنتى بتقولى حاجة
عن الموجوعين والغيطان
هى الخضرة لسة روح العالم؟
أنا عايز روحى
سمرة زى جلدك
اللون الوحيد
اللى ممكن يشرب الأرض
قالتلى
عشقت قبلى؟
كتير
كنت على جبل من فضة
لما شفت بنات الناس
بيسقوا الحياة وردتها
نزلت
شربوا من نور قلبى
وشربت من دموعهم
أجملهم انتى
عشان مالكيش وجود
من وهم طيب
دايب زى حتة سكر
ف عروق شاى خفيف
كنتى ..
قالتلى
فين عينيك؟
قلتلها
كل ما اطيرهم للسما
تبلعهم الأرض
زيك عينية
من وهم طيب
لهم نبتة ف الأرض
من روحهم اللى جريت تحت منها
اسمها وردة المفتون
اللى ياكل منها
تعريله الأرض روحها
قالتلى
كلت منها؟
قلتلها
ما لقيتهاش
ولولقيتها؟
هخاف!!
قالتلى
إنت فين؟
ف عينيكى
إنتى فين ؟
ف دمك
قلتلها
شفايفى أجمل
من ابتسامة الفقير
قالتلى
خدى أجمل
من توهة الغريب
قلتلها
ف ريقى
غرقان بيعافر
قالتلى
على سدرى
أول نظرة انقطفت م الأرض
قلتلها
ف لسانى
عصفور انفتحله القفص
قالتلى
بحرى
حزن أبيض
قلتلها
بحرى
قرش مش بايت ف حضنى
بس ملكى
سكتنا
إنتى فين ؟!
إنت فين؟!
مافيش
غير صوت كناس
بيرقص
من غير مزيكة00

أحمد!!
14/8/2004
أحمد الفخرانى ..الاسكندرية