ربنا يخليك لشهداء الاوطن يا هيثم

حلمت اني كنت في قعدة في مكان مفتوح زي فيلا بجنينة بالليل فيه كل الناس الي اعرفهم في الدنيا,و بعدين كان في بنت ما عاجباني مش فاكر غير ان شكلها كان عادي او اقل شويتين,المهم قعدت انا و هية نرغي شويتين و بعدين سابت الزحمة و راحت قعدت مع نفسها علي مرجيحة كدة شوية و رحت و قعدت اهزر معاها و امرجها,فا راحتابتسمت ابتسامة جميلة قوي!!!!!!!!!!!
شوية و غطست تاني بسأل راحت فين قالولي راحت اليوناني!!!!!!!
صحيت و انا مبسوط من منظر الابتسامة دي!!!!!!!!!!!!!!!!!

حلمت اني في مؤتمر , و ان حسني مبارك بيخطب .. و إني وقفت اشتكيتله من حاجه هبه متعلقه بالنوم , تقريبا ان في دوشه في الشارع او حاجه كده , و ان شاهر كان قاعد في الجرنان و اول ماسمع الشكوى اتصل بيا و قاللي ان الحي نفى ان في دوشه في الشارع و اكد ان كل شيء تمام , بعدين حلمت بان شاهر نايم و كسل يكتب عنده ان انا عندي حق و مش باهجص , بعدين شفت نفسي طالع من محطة مترو المعادي , و شايف ظباط و مخبرين واقفين بيسألوا الناس عن اساميهم , كل ماحد يعدي يسألوه : انت هيثم يحيى ؟
..
بعدين عديت من غير ماحد يسألني , لاقيت واحده شحاته طخينه هدومها مقطعه بتسألني : انت هيثم يحيى ؟؟ قلتلها لأ .. قاتيل لأ هو انت , انت اسم امك ايه ؟؟ قلتلها ايمان , قالتلي يبقى انت , في النقطه دي انا كنت زهقت فناديت ع العساكر و قلتلهم اهو يا عم انا هيثم زفت شوف البطاقه .. الععسكري اول ماشاف انه انا المطلوب شرخ ينادي على امين شرطه , جه ضربني على قفايا و انا مستسلم فشخ و مستغرب قوي اني مستسلم , و ماشي معاهم وواحد من بعيد من المخبرين بيعمله بايده كده حركه معناها انه يتكلبش , فقاله بغباء : اكلبشه ؟؟ قاله ايوه دي اوامر .. فسألته انتوا بتدوروا عليا ليه ,. قالي عشان اللي عملته يوم الريس يا خفيف ,, المهم خلص الحلم بشاهر وهو نايم في بيتهم . و مطنشني .. صحيت و انا مبضون من شاهر

حلمت أن ربيع طلع أهلة منفصلين و انة طلع عايش لوحدة من 7 سنين,و انة بيقولي الكلام دة و احنا قاعدين علي قهوة بلدي و منظرة مكتئب

في نص الليل قمت مفزوع
كل ما اذكره كيان ما اسود يمد يده إلى صدري ويضغط على قلبي بقوة
حسيت كأنى جالى سكتة قلبية

حلمت امبارح إ ماتش الأهلي والاتحاد الليبي له ما خلصش، وإن الاتحاد جاب جون ف آخر دقيقة

حاجة غريبة نيك انا حلمت يا شاهر اول امبارح ان الاهلي كسب النجم في تونس تلاتة صفر وان التوانسة كانو هيتجننوا بالظبط زي ماكانت عندنا العقدة من اربع خمس سنين
امبارح بقي حلمت بحلم قررت وانا نائم ان اتذكره لما اصحي لانه حلم جميل _ انا مريض بمرض اسمه شلل النوم العقل يعمل اثناء النوم وتأخذ قرارات وتفكر وتختار وانت نائم _ اولازم اكتبه او علي الاقل افضل فاكر المهم كاعادة صحيت مش فاكره ولا فاكر اني حلمت حلم جميل وسط النهار افتكرت موضوع الحلم بس عجزت يمكن لربع ساعة من التركيز الجامد جدا عن تذكر اي تفاصيل والحمد لله دلوقتي بس افتكرت ومبسوط اوي
حلمت اني كنت ماشي في احد شوارع وسط البلد مش عارف ايه هو الشارع لكن في الحلم كنت عارف الشارع كويس اوي ومش تايه عنه وكل ما امشي شوية الاقي تلاتة اربعة شباب ماسكين الالات موسيقية بيلعبوا الحان عالمية والحان مشهورة فضلت ماشي مستمتع نيك ونفسي اكون بلعب حاجة زيهم لحد ما مشيت لقيت تلاتة كبار بيلعبوا ورابعهم طفل عندوا يجي 11 سنة وماك الالة بتاعته عمال يعزف باحتراف وسط الناس الكبيرة انبسط اوي منه وكان بالصدفة مروح اخدته معايا في سكتي قعدنا ندردش وانا عمال بيني وبين نفسي احسده علي مهارته في صغر سنة لحد مفترق الطرق قالي انت كمان لازم تتعلم تلعب حاجة قلتله هحاول وانشاء الله مش هشوفك تاني الا اذا كنت بلعب حاجة ومشيت وانا متأثر اني مش هشوفه تاني علي الاقل الا بد فترة طويلة علي ما يبقي عندي وقت اتعلم اله

احد الكوابيس اللي بتجيلي كتير و حلمت بيه امبارح اني في لندن و باعدي الشارع و مش واخد بالي ان السير معكوس فتخبطني عربيه .. تقريبا ده تأثير المشهد الاول في فيلم
Closer

أنا ف الحقيقة بامشي ف وسط البلد باستمرار ، و ماباعرفش ايه الشارع ده ..

حلمت النهاردة اني ماشي ف محطة مترو السادات ، ومحصور ..
سألت عسكري واقف على أحد أبواب المحطة : "من فضلك فين التواليت؟ "
لقيته بص ع الكارت اللي انا شايله ف إيدي ، وضحك ..
اتغظت جدًا وقلت له : " بتضحك على ايه؟ "
فتجاهل سؤالي وقام مشاور لي على اتجاه الحمام ..
بابص ع الكارت - اللي المفروض انه بتاع واحد واسطة ليا - لقيت مكتوب عليه مكان التايتل :
" خيبة الدهر : فلان الفلاني " ..
قمت م النوم باضحك بشخر ، تيبيكال المنام بتاع (لبنى) السنة الي فاتت

في شقة الابراهيمية بتاعة اهلي
المفروض اني عايش فيها بس في القاهرة
لوحدي و بعدين صحيت من النوم و قاعد عالابتوب
و فجاة كل الناس المثقفين و غير المثقفين الي اعرفهم في الدنيا جولي
كريم قنديل و اينا و اسلام يوسف(واحد صاحبي من اتصالات) و ناس كتير قاعدين بيطبخوا وليمة في المطبخ
و معاهم جيتار و بيغنوا اغان يالشيخ امام
علاء سيف و منال بينضفوا لية البيت
و انا متضايق من وجود علاء و هو متضايق من انة عندي و مش بنكلم بعض بس بينضفلي البيت
و منال بتشتكيلي من مشاكها الشخصية
و رحاب بسام بتوزع جاتوة
و احمد الصم(واحد صاحبي شغال في ايبي ام) و اسماء و ربيع واقفين بيتكلموا
و انا سايب كل دو لو قاعد علي النت
اخر حاجة رن جرس التليفون فا قلت اكيد الجيران بيشتكوا من صوت الغنا

حلمت ان الشروق ها تنشر الي راضي بيكتبة هنا و علي البلوج بتاعة

حلمت إن 2 بيحكولي حكاية وأنا عارف تماما إنهم بيشتغلوني
الحكاية إنهم كانوا قاعدين على قهوة ستراند، دخل عبد الوهاب بشكله كما كان في الثلاثينيات، محدش عبرّه خالص، كل ما يقول لحد إنه محمد عبد الوهاب الناس تبص بعدم اكتراث وكل واحد يرجع للي كان بيعمله لحد ما خرج وهو غاضب

بعد خمس دقائق (وما زال الرجلين يرويان لي القصة اللي أنا عارف إنها اشتغالة) دخل عبد الوهاب الثمانيناتي، بصلعته وعكازه ومشيته الوئيدة، الناس كلها قامت تسلم عليه بحرارة وحميمية، وازيك يا أستاذ وأهلا واتفضل

ايه دا يا بو شاهر ؟؟
دا انت كده يوجين يونسكو خالص

لسة كنت بفكر دلوقتي,عندي حاجة غريبة قوي!كل الناس بتحلم بانها بتمتحن في الكلية و ها تسقط,الا انا,بحلم دايما بأولي ثانوي