أجمل تشخيص درامي

حسين !!!!!
حسين فهمي ف دور (جلال عنايت) ف (المال و البنون) .. أنا عمري ما اقول ان (حسين فهمي) ممثل عبقري مثلا ً ، ولا حتى ف الدور ده ..
و قبل الدور ده ، عمري ما اتشديت لدور عمله .. لكن ف تانية اعدادي ، كنت بالقي شِعر ف مسابقات إدارة جنوب القاهرة .. شعر (نزار قباني) بس !!!
ولما جه الجزء التاني من المسلسل و فيه (حسين) ،، كان ده أول احتكاك ليا مع تجسيد شخصية الشاعر ..

خليت ابويا ف الأيام دي يشتري لي (كوفية) ، زي كوفية (جلال عنايت) بالظبط ... (يمكن ده كان الهوس الوحيد ليا ف المرحلة المبكرة دي بأي شخصية درامية) ... و كنت بالبسها طبعا ف الشتا و انزل اتمشى بيها ف شارع الجزائر القريب من بيتي ، و كأني (جلال عنايت) !!!
أياااااااااااااام .
كان عندنا ساعتها ف المدرسة مجموعة من المدرسات بتوع التدريب (يعني طالبات تربية و خلافه بيتدربن ف الحلمية القديمة) .. واحدة منهم درست لي عربي ف الفصل لمدة أسبوع تقريبا ... كانت رقيقة و جميلة بشكل غير طبيعي ... يالهوي ..! فعلا ً كانت سبحان الله يعني ايه ده يا جدعان ؟!
طبعا كنت انا الوحيد ف الفصل اللي علاقته بالعربي أوسع م المنهج حبتين ... و كان نفسي - بأمانة - اني أعلقها في شخصيتي الجديدة (جلال عنايت) ... و ف يوم ، سألت سؤال بلاغي كده مش فاكره ، و انا جاوبت و قلتها (كناية) ..
قالت ساعتها جملة خايبة مالهاش أم أي معنى بس شائعة بزيادة :
" الكناية حمار الشعراء " ..
أذكر ساعتها اني اتخنقت بقوة !
ليه ؟؟
ماعرفش
..
(جلال عنايت) ف الدور ده ، عرفني لأول مرة بأهمية المُــلهــِـمة في حياة الفـَرد المسلم !