رقصة أورُبِّي

قلبي اتولد فوق جبال الألب ، نفس القلب !
مولود لأب مسيحي من هواة الصلب
و أم مسحورة طالعة من (الراين) بلبوص
شاورلها بورقة توت ، فابتدت له الحلب !!

ضَلِّل عليهم (أدادْجُو) بيانو ، مَبني بْخُوص *
مخصوص عشانهم ، عشان ما يرفرفوا ، مخصوص
اول ما قلبي اتولد ، قاموا رموه ف النهر !!
الأم عِشقِت جَمالها ، الأب واد خلبوص ...!

قلبي فرنساوي مابيكرهش قد القهر
عايز (ريزون داتر) ، مِتصَيَّت ف سب الدهر .. *
العايق المعجباني تفتكر عايز ايه ؟؟
مين يِفْتِش السر غيره وهُوَّ رَبّ الجهر ؟؟!

شاكِك ف (كارمن) ، و موجود ، واسمه (جورج بيزيه) !
كل اما يدخل بلد ، يفتحها (شانزليزيه) !!
سَوَّاح ، لكين لما ييجي يموت ، يموت ف (باغي) .. *
عاشق ترابها برغم انه كتب (لا نوزيه) !! *

قلبي سويسري ، لذا ، رب القلوب بناغيه ..
بسم انه طفل الجبل : مشتاق لربه ، باغيه ...
نحات جبال ، وساعات : نحات لغات ، و سوسير !! *
لو شاف عقارب يظيط ، لو شاف صنم يلاغيه !!!

قلبي انجليزي هوايته يمشي عكس السير
ضيع حياته سدى ف البحث عن إكسير
لو راح فرنسا و رجع يرطن بـ(فين دي سياكل) *
و يشوف رئيسه المباشر يفتكر (يــِـسْ سِــير) !!!

قلبي هولندي مسالم مهما خد من ركل
زارع فدادينه ورد و ع الحواشي الأكل
يفوز يعيط أوي ، يخسر يقول صافية
وف كل حال تلاقيه (فان جوخ) أسير للشكل

قلبي إيطالي غيور واخد الحياة عافية
شاعر صِقِلِّي عُتُلّ و روحه ف القافية
عمره ما يحسبها بالليرة ولا بالفِلْس
لكن بِنَتش المُتَع .. دا السر ف المافيا !!

قلبي ؟! (فارم) تسألوا عن قلبي ؟؟! بَطَّلُوا هَلْس .. *
قلبي حَجَر فلسفي مهجور ، و دَبشِة كَلْس ...
مالقيتش حَلّ ف (شِيلَر) و عْلِيت على (ريلكه) ...
حَلِّي الوحيد ف الدانوب : باغرق وبارقص (فالس) !!

قلبي بُوهِيمِي بِيِتزَفلَط ، مالوش مَلْكَة !!
لو جيت كده تْشَرَّحُه ، يِرقُص لك الـ(بُولْكا) !!
اقرا له (كافكا) حيهدا و يعدل الطّاصَة ...
ساعتها تقدر تجيبه ، و هذه بتِلكَ !!

لما اترَمِيت فِ (الرَّايِن) ، جَت بِنت بِصْباصَة ...
بَصِّت عَلَيّا وحَكِتني لخاصِّة الخاصَة ..
مش منتظر رأيهم ، قلبي اتولد بالسَّلب ...
سَمَّعني دَقّ البِيانُو ..... قلبي رقَّاصة .

محمد سالم عبادة
17/11/2007

• Adagio: درجة بطيئة من درجات العزف الموسيقي .
• Raison d'etre : مبرر للوجود !
• Paris !!
• La Nausee الغثيان هي الرواية الأشهر لـ(سارتر) ..
• Saussure : عالم اللغويات السويسري ، واضع علم اللغويات في صيغته الحديثة
• Fin de Siecle : نهاية القرن .. مصطلح أدبي يشير إلى أدب نهاية القرن الـ19
• Warum : لماذا ؟!

اللله يا اخي

و كمان الله

رباعيات ابن عبادة

ربنا يحفظكو يا جماعة ..
الله عليكو ، سيبكو انتو .