لإنه جه ف الوقت الغلط

أحب ماعليا ..
الشجرة أم شوك و ضل !
الضل وحده يتلج الحشا .. يعل
و الشوك يغل
......
ما احبش القديسة
ولا اللى ما يعرفش غير سجادة الصلا
براءة الملايكة فى أرض شايكة ..شئ يشل
و ما احبش الخسيه
و لا الفلاتي الزانى حتى ويا أحجار الفلا
خساسة النجاسة و النخاسة و السياسة و قلة الحساسة
شئ يذل
و أحب ماعليا..
الشجرة أم شوك و ضل
سيد حجاب
1966

[B]إتكلموا[/B]

أربع عساكر جبابرة يفتحوا برلين ..
ساحبين بتاعة حلاوة جايه من شربين
شايله على كتفها عيل عينيه وارمين
و الصاج على مخها يرقص شمال يمين
أيه الحكاية يا بيه ؟
جال : خالفيت الجوانين !
اشمعنى مليون حرامى في البلد سارحين !
يمزعوا في الجيوب ... و يفتحوا الدكاكين
أسأل وزير الشئون ..
و لا أكلم مين

----
بيرم التونسى

ارمي الغناوي تقاوي تبوس الأرض تتحنى

أنا ابن مصر
اللي عاطية للتاريخ هيبة
النيل وهبني يقين بالعدل مش ريبة
علمني ما أخلطش حب القمح بدنيبة
أنا مش رباية خفافيش الرمال والقحط
لذا فقري مش عيبة
ولا حلمي الغنى خيبة
ولا عائد النفط حولني
لشحطٍ محط
ــــــــــــــــــــــــــــــــــــــــــ
سمير عبدالباقي

للطيارات توابيت
وللسفاين اللي تغرب عمرنا توب الحداد
وللبيوت الشرق والنوار وفرحة المشمش
فل العرايس وانتصار الفجر ع السيف البليد
وم الغيطان طالعين في يوم العيد
طالعين لوش النشيد
***
تلاتين سنة...والبحر عازب
تلاتين سنة...والبحر يحبل بالشطوط
والحمل كاذب
تلاتين سنة...والبحر ما داقشي الصبا
لأن عينه قريبة م المستحيل
والناس بترمح في الوريد
طالعين لوش النشيد
***
الجرح واحد...والجاني واحد
واللي بينسى صرخته وسط الألم...جاحد
يا صرختين من حلق واحد
القلب عنقود الغضب طاب واستوى
واللي نوى والعزم تغريد الحديد
طالع أكيد
طالع لوش النشيد
ــــــــــــــــــــــــــــــــــــــــــــــــــــــــــــــــــــــــ
طاهر البرنبالي

بحب البحر لما يزوم
و اعشق صرختة في الريح
بحس في موجة شوق مكتوم
لناس حرة و حياة بصحيح
و احبة لما يتهادي
و ادوب لما يوشوشني
و يفرش موجة سجادة
في احلامي يعيشني

ملوش اول
ملوش اخر
قرارة طاوي اسرارة
و دايما في الهوي مسافر
ولا نهاية لمشوارة

بحب البحر

بحب البحر
و اعشق ضحكتة و انة
و احب الناس
احب الناس,احب الناس
ماهم فيهم حاجات منة
و احبك يا الي احلامي
في هواكي زهزهوا و حنوا
يا بلدي يالي و انا فيكي
عيوني ليكي بيحنوا

بحب الورد فوق السور
و اعشق ضحكتة الفانية
و احس في ريحتة شوق مسحور
ناس حرة و حياة تانية

و احبة بين ايدين عشاق
رسالة مهفهفة بأشواق
و حتي و هو بلا اوراق
كتاب العشق ,فكرة فراق


حياتة في الهوي ليلتنين
و عمرة ما كان بعمرة ضليل
ير هواة علي الماشين
و يتقاسمة مع الجاين

بحب الورد
و اعشق ضحكتة و انة
و احب الناس احب الناس
ماهم فيهم حاجات منة
و احبك يا الي احلامي
في هواكي زهزهوا و حنوا
يا بلدي يالي و انا فيكي
عيوني ليكي بيحنوا

بحب البحر
بحب الورد
و احب الناس
و احب نعيشها احرار
مرفوعين الراس
ولا تفرقنا لا الالوان ولا الاجناس
و ادوب في ادان يرفرف تحضنة اجراس
تعالوا نقيم لبكرة الجاي
يا ناس قداس
سيد حجاب

مش عارف اقولك قد ايه حلوة ياد يا عبدة

بذمتك هو ولا الابنودي؟؟؟
عندة قدرة غريبة انة يمسك الحرف و يتنية و يفردة و يحور لة

علي فكرة الاغنية دي غنتها كاميليا جبران
تسسمع؟؟

عارفها يا عم..بحبها جدا منها ..و بمناسبة سيد حجاب ..و بمناسبة الحرف اللي بيتلوي

الغش طرطش رش ع الوش بويه
ما دريتش مين بلياتشو او مين رزين

و حته تانية بيلعب فيها بالحرف برضه في اغنية لعلي الحجار

ولا انا اللي
ولا انتي اللي
املك ولا امل هواكي و تملي
..
و سامحيني
لتمحيني
دا انا عمري ما افرط
في اللي بيملي

ودي يا شادي برضه لعم حجاب من حاجاته اللي معلقة معايا

نفس الشموس بتدوس على روسنا
نفس التراب يحضن خطاوينا
طب ليه بنجري ونهري في نفوسنا
وليه نعيش ناكل في بعضينا

يا ناس الموسيقى الشعرية بتاعة الراجل ده فايقة حدود الإمتاع

مجهود عظيم بجد يا رجاله


ا

عبده..
ولد معروف حكايته
بتنحكي من وقت ميلاده ف حي شبرا من سنين
جده لابوه فلاح معز..
ف الصبح، مداح لحسن المصطفى
طواف، حبيب الأوليا
بيغيب شهور، ويعود ف ايده ضحكته
وف ديل جلابيته القديمة دمعتين
للسيدة وسيدنا الحسين..
بيعود،
وبيسأل عن عياله وزوجته
وحمارته والزرعة اللي سابها من شهور
ويعرف بإن النّوة فاتت ع اللمون
وان القيراطين اللي زارعهم زكا
خيرهم طرح..
ويصبح للأدان والذكر
ولمدح الحبيب المصطفى
ولزرعته
ويعد أيامه بدقات كحته
ويموت
ومايشوف ولد ولده
اللي كان لسه ما أصبح اسمه عبده..

( من قصيدة " عبده يا ست الحسن"- محمد عبد الحي)

الابن الموجود


انا..يا سادة.. الابن الموجود
انا الشقيق الاكبر للابن الضال
تجدوننى دائما فى الصورة موجود..اقوم بكل الخدمات..اساهم فى كل النشاطات
موجود فى بيت ابى...سالك فى كل المتاهات.. اشارك فى كل عمل
واشارك فى كل عمل...واشرف على كل المشروعات!!!
ولعلمكم..يا سادة..بيت ابى دة..فية شغل كتير قوى
فية ناس بتتعلم... وناس بتتكلم وتعلم..وكمان فية ناس بتتالم
وناس واقفة تحكى على السلم...وناس جاية يادوب تسلم!!!
وانا بكل دول مشغول
لكن عمرى ما كنت بنفسى مشغول...عارفين لية؟..لانى انا موجود فى البيت..وبكدة اكتفيت
وانا كمان موجود فى الحقل..بازرع بالفكر..واقلع بالعقل..مشغول ولما الوقت فات
ولما اخويا ضل..ومات..مسالتش نفسى..ازاى من تحت ايدى فات؟
وازاى لم اشعر ناحيتة باى اهتمامات..؟
لكن حسيت باهميتى...وضاعفت جهدى وخدمتى...ونسيت اروح لة..واسال لية
واقولة ارجع..غبت لية..ايوة نسيت...لانى موجود فى البيت..وبكدة اكتفيت
ويا للعجب..لهذا السبب..غلبنى الغضب
ولما اخويا رجع..لقيت قلبى اتوجع
ويا سادة..عشت الجرح..وما ذقت طعم الفرح..لانى اكتفيت بوجودى فى البيت
انا موجود فى البيت..انا موجود فى الحقل..انا اخدم الكل
انا اقوم بكل الاعمال لكن فى الاخر(ابى لم يعطينى ابدا لافرح)
"مع انة كان ينبغى ان نفرح ونسر"
انا يا سادة...لست ضالا..لكنى لست فرحا..كفايتى وجودى
فلم تر عيناى فرح السماء
انشغلت بنفسى..عن نفسى..فلم ادر بنفسى..هزمتنى ذاتى فلم اعرف الا انا
الابن الموجود
وحينما جاء وقت الفرح..لم يعد لى اى وجود
وصرت انا الابن الضال..بعد ما كنت انا الابن الموجود



القصيدة دي لقيتها على جهاز في الجامعة الأمريكية مش عارف أي معلومات عنها