مصر طاهره ما فيهاش فساد
بيضه لون البفته جدا
يدوب امضة اعتماد
و الشيطان ع المادنه يدن
كوثر مصطفى:
هو سؤال أنا باسأله
مجروح في آخره وأوله
إيه الوطن؟
إيه الوطن لما نكون متغربين عن روحنا حتى ونفسنا
إيه الوطن لما نكون متفرقين ولا أي شيء بيلمنا
لما الغنا، كل الغنا، زي السكات
إيه الوطن، لما تكون أرض الوطن هي الشتات!!!
-----
كل الليل مايقرّب
باتعذّب ياما, وبتغرّب
وبحس برعشه
وبدهشه
وبحس برغبه
ف اني اهرب,
مابحبش نوم التوابيت
مجنونه..,
معجونه بمية عفاريت
باكتب شعر
وبعزف عود
بحب اللمّه
وبفرح لمّا
السما تمطّر
والقطر يفوت
لابخاف من سوط, ولانبوّت
برعش بس
لمّا بتيجي , ولو بالهمس
سيرة الموت
عاوزه اعيش
احد الدنيا
ماتبقى خلاص
ويبقى الكون
بح مافيش
ويدوب فستاني ابو كرانيش
عاوزه اعيش
---
الصحرا م الاول..
الصحرا م الاخر
من هنا..ولاّمن هناك
ابدأ منين
السّكه ماهيش سكه وحده
السكّه ماهيش سكتين
يااّخر المصابيح
امشي بعكس الريح
ولاّامشي وياها
أنده..ح تسمعني؟
ان كنت طب سامع
من توهتي رجّعني
الصحرا م الاول
الصحرا م الآخر
---
أصعب ما في الغربة .. الغربة
موش عارفه ازاي
موش قادرة أعبر..
أو أشرح قصدي
أكبر مني الإحساس
أكبر من شعري ومن لغتي.
صدقني..
الغربة الصبح تصبح على كل الناس إلا حبايبك
الغربة الليل تتمسى بكتم النفس الطالع منك
وبخنق الرغبة
وبقتل الإحساس الصارخ انك
انك مقهور، انك مظلوم.
فيه أيد ممدودة بكرباج بتقطع جسمك .
لازم.. لازم تتحمل..
---
موسم زرع البنات عدى بخيانة
رموشك لا بدرت ولا رشت،
الزرعة اخبت وماتت،
الأرض عطشانة
والطالع ما بين عينيك، زرعة شيطانة
غنا:من البوم علي فين لفريق صابرين ,كلمات سيد حجاب و الحان و غناء كاميليا جبران
ودي اغني غنوة للحرية
و لحلم طاهر في الضماير عاش
و لوردة حمرا مفتحة مندية
و لدنيا تانية لسة ما عشنهاش
و للصبية الي الهوا شالها
و طرف شالها في الهوا رعاش
و لغنوة العاشقين عالتلة
لماالقلوب قالت و صوتنا انحاش
و لاهلنا الجدعان و الاصلا
و للصباح الي لاح و اتدلي
ودي اغني لأبني لكني
اوان غنايا ما جاش
الشارع دة كنا ساكنين فية زمان
كل يوم بيضيق زيادة عما كان
اصبح الان بعد ما كبرنا علية
زي بطن الام
ملناش فية مكان
و الشوارع حواديت
حوداية الحب فيها
و حوداية عفاريت
و اضحكي يا حلوة لما اسمعك
الشارع دة رحت فية المدرسة
الي باققي منة باقي
و الي مش باقي اتنسي
كنسوة الكناسين بالمكنسة
و بدون لحظة اسي
منا برضةكمان نسيت
دي الشوارع حواديت
حوداية الحب فيها
و حوداية عفاريت
و اضحكي يا حلوة لما اسمعك
و الشارع دة اولة بساتين و اخرة حيطة سد
لية فية قصة غرام ما حكيتش عنها لاي حد
من طرف واحد و كنت سعيد قوي
بس حراس الشوارع حطوا للحدوتة حد
دي الشوارع حواديت
حوداية الحب فيها
و حوداية عفاريت
و اسمعي يا حلوة لما اضحكك
في كوبلية انا ناسية
ازى حالك
مش لسه برضة زى حالى
ازى حالك
لسة بتضمك شوارع
لسه طارداك البيوت
لسه قادر ع السكوت
ازى حالك ؟ مش لسه حى
الله يعينك ع اللى جى
مجهولة
على الضريح
في رثاء جمال عبد الناصر
بلال"الأمه العربيه المعاصره"
السكه مفروشه تيجان الفل و النرجس
و القبه صهوه فرس عليها الخضر بيبرجس
و المشربيه عرايس بتبكي و البكى مشروع
***
من ذا اللي نايم و ساكت
و السكات مسموع
سيدنا الحسين؟
ولا صلاح الدين ولا النبي
ولا الأمام؟
دستور يا حراس المقام ولا الكلام بالشكل دا ممنوع؟
***
على العموم
انا مش ضليع في علوم الأنضباط
***
ابويا كان مسلم صحيح
و كان غبي
و كان يصلي ع النبي
عند الغضب و الأنبساط
***
ابويا كان فلاح تعيس
في ليله ضلمه خلفوه
و ف خرقه سودا لفلفوه
و ف عيشه غبرا
طلعوه
و عشه مايله سكنوه
و لصموه
و طلسموه
و دجنوه
و جهزوه
و جوزوه على عماه
فكان محير في هواه ما بين امي و الجاموسه
و كان يخاف يقتل ناموسه
و كان خجول خجول
خجول
و كان دايما يقول استغفر الله العظيم من باب الأحتياط
***
ابويا طلعتوه حمار فكان طبيعي يجيبني جحش
لا اعرف نبي من اجنبي
و لا مين ما جاش ولا مين ما رحش
موسى نبي
عيسى نبي
كمان محمد كان نبي
و يا قلبي صلي ع النبي
و كلنا نحب النبي
و كل وقت وله ادان
و كل عصر و له نبي
***
و احنا نبينا كده
من ضلعنا نابت
لا من سماهم وقع
ولا من مرا شابت
ولا انخسف له القمر
ولا النجوم غابت
ابوه صعيدي و فهم قام طلعه ظابط
ظبط على قدنا و ع المزاج ظابط
فاجومي من جنسنا
ما لوش مرا عابت
فلاح قليل الحيا
اذا الكلاب سابت
ولا يطاطيش للعدا
مهما السهام صابت
عمل حاجات معجزه و حاجات كتير خابت
و عاش و مات وسطنا
على طبعنا ثابت
و ان كان جرح قلبنا كل الجراح طابت
ولا يطولوه العدا
مهما الأمور
جابت
أحمد فؤاد نجم
1985
يا واد انت اللي انا هو
حتة توجع قلبي من جوة
يا غريب الضعف والقوة
يا سلام الحاضر الماضي
يا دلع فاضي ودلع فاضي
ياللي بتعدل على القاضي