بهاء جاهين مش عارف ليه بحس إنه شارب الصنعة ف كفه مش ف قلبه
م الآخر بحس إن فيه حتت كتير طبيخ ف شعره
مثال
يا خسارة ما بتطلعش
ما تفتكرش إني نعش
إيه لازمة النعش ف الموضوع غير العين و الشين
مصفحات .. من عيون الناس بتتفجَّر
وانت العيون والبضاعة وزيطة المتجر
يا عيني ما عرفش يجيبى حاجيم و راء ف خد كلمة فصحى و حط جنبها زيطة يعنى قال عشان يداري عليها
و كمان
إيه ده
ده كل الكلام بعده تركيبة من إيدين صنايعي مش شاعر
اللي مش مصدقني يقراها تاني و يحاول يرَّبط الكلام ببعضه حيفهم قصدي
و صباحو يا لون وولف
ص يا صيدلاني باشا,كنت بشاطرك نفس الافكار دي لحد فترة قريبة قوي,كنت فاكرة شاعر علشان ابوة شاعر,و و كنت واخد نفس الفكرة الغلط عن امين حداد برضة,الفكرة دي كونتها من الحاجات الي الاهرام بينشرها لهم,لحد ما قريت لة ديوان "الارتفاع المسموح متر" و خلاني فعلا اقتنع ان الراجل دة شاعر,ها ابقي احط شوية شغل لة هنا
نيجي بقي لكلامك عن القصيدة,فؤاد حدادا لة كلمة حلوة,يقولك القافية فتوح,زي المقرأين كدة,ساعات القافية بتسحبك معاها تقول حاجة,مش عيب,بس ما تطولش
"يا خسارة ما بتطلعش" ان شايفها في مكانها تماما,و مناسبة للجو بتاع القصيدة,
انا معاك في ان الحتة دي واقعة و ملهاش دعوة بحاجة
"ما تفتكرش إني تاجر
نُور و رُولمان بِلْي
مصفحات .. من عيون الناس بتتفجَّر
وانت العيون والبضاعة وزيطة المتجر"
و بعدين انا شايف القصيدة فيها وحدة موضوعية ,مش متجمعة خالص,يعني الراجل باديء بيقولك:
ما تفتكرش إني باتعب لما بتسافر
أنا بس بانساك .. واعافر
في الدنيا من غير أخ
و خاتم بي:
وإن كنت فاكر
يا نني عيني إني باتعب لما بتسافر
كل الحمام هاجِر
كل النسايم خناجر
كل العيون طالعة في الصورة ..
ولا بتلمعش
و حتي لو فرضنا جدلا ان مفيهاش وحدة موضوعية,مش مشكلة,واحد زي فؤاد حداد مثلا ممكن تطلع لة 5 او 6 قصايد من جوة كل قصيدة,
و بعدين بامانة كفاية الفتحة بتاعة القصيدة دي,دي لوحدها تخليني اقول علية شاعر.انا عارف ان دة مش نقد موضوعي بس مين قال اني ناقد,في شاعر صغير من جيلنا اسمة منتصر,ما سمعتش لية غيرنص بيت شعر ,دة كافي بالنسبة لية اني اقتنع انة شاعر حقيقي:
"طفح المجاري في حارتكم علمك رقص البالية"
يتمشى ف ضلوع المحطة
خلى حبات التراب اتعودت ع الأنتظار
كل شيء جواها بيصفر
م الحيط اللي ساكت...للغبار
يوم قيامة
و الرجول تهرس رجول
و العيون جواها وحش
يبلع الضل الخجول
المسافر مستلف وش اللي راجع
و اللي كتفه تاعبه من شنطه رحيله
و اللي قلبه تاعبه من تقل المواجع
إلا هو
لما كانت ايده ماسكه ايد حبيبته
و اللي بين ايده و ايدها هيا طيبته
كان بينقش بعد بكره و بكره
ورده فوق جبينها
عشقته من حبه ليها
كل نسمه تعدى بين قلبها و بينها
كل لحظه في عمرهم الأخضر
بقت رنة وتر
فجأة قدم لحظة واحده
زي ما تكون رجله دايسة
فوق حته قدر
***
صلاح الدين عبد الله
يناير 2002
أدخل من الباب اللي ضيه شحيح
لوم المحبه صريح
الغربه قاسية و انت ف بلادك
لكنها اقسى ف مهب الريح
بكره مؤكد ملك لولادك
و الأرض دي اللي جرحت جلدك
بصخرها القاسي غميق اللون
و شحها و حزنها و سرها المدفون
أحن على كعب رجلك
من قلوب اصحابك
و شبر منها بوسع الكون
فادخل من الباب اللي ضيه قليل
مش عارف مين صاحبها
شباك النبي على باب الله
على باب مقفول او باب مفتوح
ح اكتب مواعيد اللقا و اروح
و ارجعلك تانى شعاع بيفوح
و قتيل في الحب .. و موش مجروح
قادر على طعن الليل الغبي
بس انتى أؤمرى .. او حتى ارغبي
شباك النبي على باب الله
............
على باب الجنة يا طعم التوت
انا ممكن احب لحد ما اموت
بـــلاغ
سرقوني مني ..
بلغت عني ف مركز الشرطة
أعلنت عني ف " عمود " : " ابحث مع الشرطة "
لا حد مسئول بعت لي ولا حد ف بلاغي اهتم
شدوا انتباه البلد " والمنتخب " مهزوم
دورت تحت الكراسي وزحمة الطرقة
بين " العقاب " في التراب مالقيت أثر ليَّا
حتى ف كناسة الزبالة ودورة المية .. ،
.. بين " مشايات " المفارق
ناديت عليَّا ف ( حواري ) البهو والقبة
من تحت سجاجيد قطيفة ودمها بيلمع
ملقتش نفسي ف أماكن " عميا " " طرشانه "
شميت " بلك " الرصيف ومَرَبِّة الأسفلت
حللت دم الفصايل سلبي وإيجابي .. ،
ن لقيت فصيلة الخلايق لونها غير دمّي
لا الشكل دا شكل أبويا ، ولا واحده زي امي
أوصف لهم شكلي كيف وأنا عندي"انفصام ذهني"
رغم إني عندي " اكتئاب " جوه السنين صاحي
لسه"الخرايط"فاكرها برسمها غيابي .. ..
.. .. أرض وسما وتضاريس
روّحت فيا وفرشت المصطبة ف قلبي
نادم عليّا " الغفير " من جوه " صحن " البيت
ـ جايز أكون باحلم !!
فكرت يمكن يكون حد ف بلاغي اهتم
شمُّوا " الكلاب " الدم
" الكلب هول " اتفزع أول ما شاف دمِّي
إنْدار عليَّا " الحرس " ربطوني من " كُمِّي "
.. رغم إني عريان ..
.. ربطوني وما تسألونيش
في إيدي آخر لساني وأوّله ف " فمي "
بانت ملامح أمي من تحت " كرسي الوضع " مصلوبة عرض وطول
رابطة " بشهادة ميلادي " الجرح من مده ما قدرتش أسألها ..
.. خُفْت الجرح يتمدد ويعاودوا تاني الضرب ..
.. ، ويفكروا بإني جاي أعلن " بداية حرب "
وانا إسمي جوه " المضابط " من زمان " مضبوط "
" القاضي " قال انتباه من قبل ما يقول سكوت
طق طق ططقطق محكمة
" يحول المتهم لفضيلة المفتي !!! "
فوق " جبهة " القاضي " عقدة " بتربط الحاجبين
من غير دليل اتهام اتصدق الإعدام
فوق أنف " عشماوي " حبل المشنقة " مكرمِش "
نُظِر ولاحمر ملطخ بدلة الإعدام ..
" هستيريا " قبل الإطلاع .. نفسك في إيه ؟!
صوت المعارضة – اعتراض – .. ..
.. .كيف يُعدم المُعدَم ؟!
ها ها هأ ها .. أو نفسك في إيه ؟
لو كان مهم .. اكتبوا بريشة حمام .. ..
.. ..بالدم فوق المشنقة
شُبِّه لهم شُبِّه لهم شُبِّه لـ هُـ مْ .
· أبو العرب ابو اليزيد
من ديوان : النخلة ما بترميش رطب
في العالم العربي تعيش - تميم البرغوثي
في العالم العربي، تعيش،
كما قط ساكن تحت عربية
عينيه ما تشوف م الدنيا دي حاجة إلا الجِـزَم
في العالم العربي تعيش،
كما بهلوان السيرك
تحتك بهلوان دايس عليه
وفوق دماغك بهلوان دايس عليك
والكل واقف محترم
في العالم العربي تعيش،
مباراة بقالها ألف عام
لعّيبة تجري يمين شمال
والكورة طول الوقت
في إدين الحكم
في العالم العربي تقول للبنت حبيتك
تناولك بالأَلَم
في العالم العربي تعيش،
تشتم في طعم المية و الطعمية
والقهوة ورُوَّادها وفي مراتك وأولادها
وحر وزحمة الأوتوبيس
وفي اللي بيعمله ابليس
وفي التفليس
ولو سألوك
تقول الحمد لله ربنا يديمها نعَم
في العالم العربي تعيش،
كما دمعة في عيون الكريم
المحنة تطردها يرجّعها الكَرَم
في العالم العربي تعيش،
تلميذ في حوش المدرسة
من غير فطار
عينه على الشارع
وبيحيي العَلَم
في العالم العربي تعيش،
بتبص في الساعة
وخايف نشرة الأخبار تفوت
علشان تشوف ع الشاشة ناس،
في العالم العربي،
تموت.
(تميم البرغوثي من ديوان "المنظر")
الونس مولع يا جدعاااااااااااااااان
شوفتوا بقى
واحنا عبيد
لا عاد عمر
ولا عاد لنا ابن الوليد
احنا عبيد
وسِيدنا مش هو الإله
سِيدنا قابض ع الوريد
قتل النشيد
ورفعنا صُورُه من جديد
تتباهى بيها الأغلفة
وماعدشي لينا غير سنان
لو تنفتح منها تبان
معدة وخاوية من زمان
مشتاقة طحن الأرغفة
أنا مش نبي
لكني باسعى عشان أكون
وازاي
حاكون
والدم
مالي
الأرصفة؟!
ــــــــــــــــــــــــــــــــــــــــــــــــ
عمر نجم
ديوان: سعيد يعني happy
نقطة نظام هنا معلهش
الراجل دا : عمر نجم
مخدش حقه ليه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
![tongue.gif](http://4.<a href="http://www.forumer.com">forumer</a>.com/html/emoticons/tongue.gif)
![biggrin.gif](http://4.<a href="http://www.forumer.com">forumer</a>.com/html/emoticons/biggrin.gif)