كل سنة و انت طيب يا ريس.....حموكشة

مهما كانت الحاجات العبيطة الي عملها منير في 10 سنين الا ان كل دة يتغفر لة علشان حاجة واحدة عالاقل انة عرفني بيكم واحد واحد وواحدة واحدة الي اعرفهم شخصيا و الي اعرفهم عالمنتدي ,من غير اي نوع من انواع المجاملة -لا اتخيل نمط حياتي كان ها يستمر ازاي لو مكنتش قابلتكم

في نفس يوم عيد ميلاد الريس ,مع فارق زمني تقريبا نص قرن,اتولد واحد من اعز اصدقائي و اول واحد عرفتة فيكم ,محمد فتحي او كما يحب انة يعرف نفسة -حموكشة. اليومين دول كدةبنقفل تقريبا نص سنة من الصداقة الي لو اتحسبت بمقياس الوقت مش ها يتقال عليها صداقة من اصلة,لكن بمقدر العمقع هي اعمق من صداقات تانية بقالها 10 و 15 سنة معايا

عرفت حموكشة من اول شهر في منتدي منير القديم-بعد ان تم اتهامة" بالخيانة" و "العمالة" و خيابات تانية كتير بسبب موضوع
the king is not the king any more
اتكلمنا بعدها فترة طويلة,حوالي 6 اشهر عالماسنجر في كل شيءفي تجربة جديدة علينا احنا الاتنين, انك تصاحب حد ما شفتوشي عمرك ,و لسة فاكر لحد دلوقتي صدمة الاكتشافات الاولي في ميدان التحرير اول مرة نشوف بعض وش لوش
.
كل دة كلام خاص و مش مهم -ممكن اقولة لة في رسالة خاصة- بس انا عاوز اتكلم عن اشياء عامة هنا ,علي المستوي التقني هو محرر و صحفي و شاعر و مترجم و مستخدم هايل للكمبيوتر ,مع مجموعة من المهارات التقنية و الانسانية الاخري زي القدرة السريعة علي التعلم و الذكاء,و الغريبة انة بيعمل كل دة بأتقان شبة تام,و كل واحدة من دول كفيلة بأنها تعيشة حياة كريمة جدا في اي دولة غير دولتنا الوسخة لكن العكس بيحصل,بل بيحارب علي نطاق واسع,و كأنة متعمد طول الوقت من قبل الاغبياء و الجهلة

علي المستوي الانساني يكفي جدا تقبلة للاخر,امر مش موجود في 99% من المصرين,بالاضافة الي اصرار رهيب و حب للحياة خلاة يعيش و لسة عايش في ظروف لو اتحط فيها كاتب الكلام دة و اي حد منكم بيقرا تكون نسبة فشلة اكبر من نسبة نجاح جوزيف ستالين في اي انتخابات في العهد السوفيتي البائد

من الحاجات التانية الي بتبهرني في حموكشة,قدرتة علي التقاط التفاصيل وسط الزحمة و تحليلها و ربطها ببعض,دة غير الجرأة الرهيبة و القدرة علي اتخاذ قرارات مصيرية,و قدرتة علي الاستغناء الي اتمني اني امتلك نصها -مع كرم غير عادي بتجعلة يضحي بكل القليل الي بملكة من اجل اسعاد انسان مهم لة,حتي لو كان يمتلك اكتر

علي الفكرة الكلام دة مش اعلان جواز,لانة مرتبط بالفعل

, بس انا حبيت اكتب بالعامية لاني مقتنع انها بتوصل الصورة احسن في المواقف الي زي دي,و فضلت كمان اكتب الكلام دة مرة واحدة من غير تنقيح علشان يبقي عفوي و صادق
اليومين دول بدأ و بعد حوالي سبع سنين من الغزل الصبور يحصد مجهودة و اتوقع الحصاد يبقي وفير,خلال سنتين او تلاتة متوقع اقعد عالقهوة و اقول بكل فخر"عارفين محمد فتحي بتاع كذا و كذا و كذا" دة صديقي
بكل اسف طبيعة الفضاء المفتوح الي احنا فية بتمنعني من ذكر تفاصيل اساسية و مهمة لتكملة الصورة لمن لا يعرف حموكشة شخصيا,ها اكتفي اني اقول عالملأ و بكل صدق اني فخور بذاتي جدا اني اعرف شخص و صديق زيك و ان علاقتنا تعمقت رغم كل الاختلافات في مكان ووقت الميلاد و النشأة و نوعية التعليم و الطبقة و الخلفية الاسرية و الاجتماعية

حموكشة اللي اعرفه انهارده غير صاحب الكاريزما الأولاني للي قابلته اول مرة في حياتي على حمو و كنت انا و هو بس - ما شفتش حموكشة اول مرة عن طريق حد او وسط ناس..و دي بتفرق في مدى المراحل اللي بتقطعها عشان تعرف الواحد - و غير حموكشة اللي قاللي تعالى اقابلك يوم كنت غريب فعلا بتفكيري عن هذا حياة العالم الذي لم يعجبني و افكر في تركه..و غير حموكشة اللي وعدته بشغل و لسوء تقدير الوقت مني لأمور شغلي لم افعل له شيئا مما كان يتوقع مني..و غير ذلك الذي جاء الى غرفتي و لم اشعر انه غريب عنها..

رغم انه مش كل دول..
بس ما اقدرش اقوله غير اني سعيد اني اعرف حموكشة بتاع انهاردة..

كل سنه و انت طيب يا خال فتحي